五更瀉

泄瀉|中醫

「五更瀉」係中醫一個特定病證名，又叫雞鳴瀉、晨瀉或者腎瀉。就係話每日清晨五更天（大約凌晨3-5點，或者臨天光嗰陣）準時肚痾，痾完通常就舒服好多，好似鬧鐘咁「準時」。

呢種情況，好多時都當係「腎陽虛」，用四神丸主治，即肉豆蔻二兩 (60g) 補骨脂四兩 (120g) 五味子二兩 (60g) 吳茱萸浸，炒，一兩 (30g) 生薑四兩 (120g) 紅棗五十枚，搗碎，加水適量壓榨取汁，與上述粉末泛丸，乾燥即得。每服9g，每日1-2次，臨睡用淡鹽湯或溫開水送服^。但睇症嗰陣，好常見到有啲人食咗四神丸好耐，都冇乜改善。因為「五更瀉」唔係全部都係「腎陽虛」證，都有可能係脾虛濕盛、肝鬱脾虛，甚至係患者成日夜晚食生冷、零食搞到食積咁。

《黄帝内经》言：“脾者，喜燥恶湿也”，如果脾虛生濕，清陽被阻住，搞到脾運化失常，中焦水濕停住，脾陽下陷，黎明嗰陣係陰氣隨陽氣升嘅時候，但脾陽下陷，陰濕阻住就拉肚子。呢類就要健脾祛濕止瀉，亂咁補腎陽反而搞亂晒。睇具體表現，可以揀東垣嘅補中益氣湯、升陽益胃湯，如果精神差兼冇胃口，就用清暑益氣湯，輕輕靈靈醒胃，唔好心急火燎。

《張聿青醫案》有云：“然肝病亦有至晨而泄者，以寅卯属木，木气旺时，辄乘土位也。” 黎明嗰陣係少陽木（肝）最旺嘅時候，如果肝氣升發唔順，鬱住升唔到，肝木疏泄唔好，肝氣就欺負脾土，脾虛肝旺，脾運化差，水穀化唔開，就會肚痛、腸鳴、肚痾。呢種五更瀉，通常拉之前肚脹脹、痛痛地走來走去，好似腸入面有風，聽到腸「嘰里咕嚕」響，凡係情緒唔好、精神緊張，例如嘈交、工作學習壓力大嗰陣，清晨肚痾就更加勁。呢個時候都唔可以亂補腎陽，要疏肝加健脾，可以痛瀉要方做主方，適當加柴胡、茯苓、益智仁等，或者用逍遙散做主方都可以考慮。

如果有呢類症狀，建議搵你嘅中醫師把脈開方之後，先問清楚可唔可以用中成藥長期調理啦～

 #泄瀉 #中醫 

(文章照片由互聯網提供)

(譽豐中醫診療中心版權所有, 未經同意, 不得轉載或翻印)